تحية عاطره وبعد :
هذه القصيدة منقولة من التراث الشعبي العريق أتمنى أن تنال إعجابكم
يا حسراه على بكري ياتراس منين كانت الناس ساكنة في الباديا
و النية صادقة على اساس والمعيشة حاجة دونيا
مصروفهم تمر وهرماس و خيشة القمح ديمة مرحيا
مرمرز و الفريك لهوا دساس يبقاوي حتى لشتويا
المرأة وحدة تحلب أدراس و تملي ذيك القدحيا
واللبن معروف عند الناس وبوصلوع عندو شهيا
والدهان يليق في لعراس و عكة الروب زينة يا خويا
روينة و مردود نتاع حباس خدمة لخوان و الزهديا
القهوة المخلطة سكنة في الرأس لزم طيب في كل ضحيا
لتاي الزين نشرب منو كأس زعتر وفيجل نتاع جباليا
المطلوع بنين و طاجين ملاس طايب على الوقيد و الحوشايا
والطعام الزين فاير في الكسكاس مخدوم باليد ورق الحلفايا
المرقة فوقاع ومعاها الترفاس زادلها في البن شوي حروريا
الجبن معروف هدية للناس قفصو راه أمتين وملمد قايا
الكليلة بعد ما تيباس مرفوسة بالقرس لشهايا
القربة ماتفرقش خلاص ريحتها قطران ديما مطليا
السكنة تتبدل في كل بلاص ماعندها لاسانتر لا بيليا
البيت الحمراء راها دارت قنطاص وهذي عادة نائليا
المكحلة معمرة ديما قرطاص والعود مسرج نتاع فروسيا
اللبسة عربي طابعها برنوص قندورة بيضاء معاها لحفايا
الصباط متين طعبي ياتراس و الخيال الزين نتاع رجوليا
الصابا إذا جات يليقلها خماس والتوايز معاها كرايا
النادر مايجو د صالح لدراس يصفيها البحري تعشي مقضيا
مطمر مخدوما ماعليها باس و تظهر وقت الحرث كما هيا
وقدام الرحلة يبعثو تراس يحوس دار شتاشح و حلفايا
يرفدو على الإبل ومشيتهم بسياس و الحومة فوق الناقة مبنيا
عجايز تمشي تقول أعراس و المغزل في اليد راها قنايا
هذا وقت عاشتو ذيك الناس وضرك نحدثك و أسمع ليا
كنتفكر نبقى هوداس واش يحلا ضرك ياخويا
كثرت الحدايد وكل الأخر عساس طامع في قسمة قال راها ليا
أيدير الدوسي ويجيبلها قوصاص ويخرج عليها ضرك ماليا
يقرس الشجرة و يخليها تيباس وحرقت الأرض ولات رباويا
تنحت الرحمة من قلوب الناس وزلت البركة في كل حيا
كثرت الفتنة وزادها الفلاس وكل يوم راك تسمع بليا
كثرت الأمراض وزاد وجع الرأس ولتسأله يقلك ضاقت بيا
النساء لهيا ضرك بالتحواس قالت راه عندي الحوريا
المرأة كثرت لها الأعراس ويناه ليلبس كيما هيا
و الطفلة تطور في الألباس قالت مكانش ليتحكم فيا
و الطفل دار سلسلة نتاع أنحاس السروال مطبب قال لمودة هيا
أركب عباس على دباس والله ماتعرف ذاك من ذيا
الشباب لمعندو ساس راه فسد بيه قلة التربيا
السرقة و الكيف و دخلة الأحباس وعاد مايخمم في حتى حيا
نطلب ربي ملك الناس يلطف بينا في الأخرة و الدنيا
يحفظنا من الوسواس الخناس ويبعد عنا الناس الحسديا
